دبئی: (ویب ڈیسک) افغانستان کرکٹ ٹیم ورلڈ کپ جیتے گی تو شادی کروں گا، افغان سپنر راشد خان نے خبروں کو بے بنیاد قرار دیدیا۔
خیال رہے کہ افغان سپنر راشد خان سے متعلق یہ خبریں زیرِ گردش تھیں کہ انہوں نے اپنے ایک بیان میں کہا تھا کہ افغانستان کرکٹ ٹیم ورلڈ کپ جیتے گی تو شادی کروں گا۔
راشد خان نے اے ایف پی کو انٹرویو دیتے ہوئے کہا کہ میری ساری توجہ ٹی ٹوئنٹی کے ورلڈ کپ پر ہے، فی الحال شادی کا کوئی ارادہ نہیں ہے۔
راشد خان نے خود سے متعلق بیان پر وضاحت پیش کرتے ہوئے کہا کہ میں نے ایسا کبھی نہیں کہا کہ افغانستان ورلڈکپ جیتے گا تو شادی کروں گا، میں خود سے منسلک کیے گئے اس بیان کو سن کر حیران رہ گیا تھا۔
افغان کرکٹر نے کہا کہ میں نے صرف اتنا کہا تھا کہ آئندہ کچھ سالوں میں میرے پاس کرکٹ کھیلنے کے زیادہ مواقع ہیں، اس کے علاوہ تین ورلڈ کپ بھی ہیں، اسی لیے میری توجہ شادی سے زیادہ کرکٹ پر ہے۔
