لاہور: (ویب ڈیسک) پاکستان سپر لیگ میں کوئٹہ گلیڈی ایٹرز کی نمائندگی کرنے والے پاکستانی کرکٹر خواجہ نافع نے بنگلا دیش پریمیئر لیگ (بی پی ایل) میں ادائیگیاں نہ ہونے کی خبروں کی تردید کردی۔
گزشتہ دنوں خبر سامنے آئی تھی کہ پاکستانی کرکٹر خواجہ محمد نافع بنگلادیش میں پھنس گئے ہیں اور ان کو فرنچائز نے اب تک پوری رقم بھی ادا نہیں کی، خواجہ نافع کا پاکستان واپسی کا ٹکٹ بھی جعلی ہے جس کے باعث وہ ڈھاکا ایئرپورٹ پر رکے ہوئے ہیں۔
تاہم اب پاکستانی کرکٹر خواجہ نافع نے ایسی تمام خبروں کو بے بنیاد قرار دے دیا ہے۔
خواجہ نافع نے کہا کہ بنگلادیش ایئرپورٹ پر نہیں بلکہ فائیو سٹار ہوٹل میں ہوں اور میری تمام ادائیگی بھی ہوچکی ہے، میرا ٹکٹ جعلی نہیں نکلا، میرے حوالے سے غلط خبر پھیلائی گئی۔
یاد رہے کہ اس سے قبل محمد حارث بھی بنگلادیش میں پھنس گئے تھے اور ان کی ٹیم دربار راج شاہی نے کھلاڑیوں کو گھر واپسی کے ٹکٹ نہیں دیئے تھے، کھلاڑیوں کو ٹیم انتظامیہ کی جانب سے معاوضے بھی ادا نہیں کیے گئے تھے۔
