ممبئی: (ویب ڈیسک) ساؤتھ انڈین اور بالی ووڈ کی معروف اداکارہ تمنا بھاٹیہ نے کرپٹو کرنسی سکینڈل سے متعلق زیر گردش خبروں کو بے بنیاد قرار دے دیا۔
بھارتی میڈیا رپورٹس کے مطابق تمنا بھاٹیہ کا نام 2.4 کروڑ بھارتی روپے کے کرپٹو کرنسی فراڈ میں سامنے آ رہا تھا۔
مختلف ذرائع کی جانب سے یہ خبریں سامنے آ رہی تھیں کہ اداکارہ تمنا بھاٹیہ اور کاجل اگروال سے 2.4 کروڑ بھارتی روپے کے کرپٹو کرنسی فراڈ کے سلسلے میں تفتیش کی جائے گی تاہم اب تمنا بھاٹیہ نے ان گردش کرنے والی خبروں پر لب کشائی کی ہے۔
اداکارہ نے زیر گردش خبروں کو افواہ قرار دیتے ہوئے انہیں مسترد کر دیا۔
انہوں نے جاری کیے گئے بیان میں کہا ہے کہ میرے علم میں یہ بات آئی ہے کہ کرپٹو کرنسی سکینڈل میں میرے ملوث ہونے کی افواہیں پھیلائی جا رہی ہیں جو کہ غلط ہیں، میں غیر قانونی سرگرمیوں میں ملوث نہیں، میری درخواست ہے کہ بے بنیاد اور ایسی جعلی، گمراہ کن خبریں اور افواہیں نہ پھیلائیں۔
تمنا بھاٹیہ نے یہ بھی بتایا ہے کہ میری ٹیم ضروری قانونی کارروائی کے لیے صورت حال کا جائزہ لے رہی ہے۔
