ڈریپ کا ایکشن ، امراض چشم کی دوا کا ایک بیچ غیر معیاری قرار

Published On 27 September,2023 02:31 pm

اسلام آباد: (دنیانیوز) ڈریپ نے امراض چشم کی غیر معیاری دوا کی فروخت پر ایکشن لیتے ہوئے امراض چشم کی دوا کا ایک بیچ غیر معیاری قرار دے دیا ۔

ڈرگ ریگولیٹری اتھارٹی پاکستان  (ڈریپ ) نے کومیسیٹن آئی ڈراپس کا پراڈکٹ ری کال الرٹ جاری کر دیا ، کومیسیٹن آئی ڈراپس کا بیچ سی وائے ایف 003 غیر معیاری قرار پایا ہے۔

ڈریپ کے مطابق کومیسیٹن آئی ڈراپس نبی قاسم انڈسٹریز کراچی کی تیارکردہ ہے، کومیسیٹن کا سیمپل صوبائی ڈرگ انسپکٹر جامشورو نے ٹیسٹنگ لیب بھجوایا تھا، دوا کا بیچ فیڈرل ڈرگ اینالسٹ، سی ڈی ایل کراچی نے غیر معیاری قرار دیا ۔

ڈریپ نے کومیسیٹن آئی ڈراپس پراڈکٹ الرٹ شہریوں ، ڈاکٹرزاور کیمسٹ کیلئے جاری کیا ہے۔

ڈریپ کے جاری الرٹ میں کہا گیا ہے کہ کومیسٹین ڈراپس آنکھوں کے بیکٹریل انفیکشن کے علاج کیلئے ہے، ڈاکٹرز مریض کو کومیسٹین آئی ڈراپس کا متاثرہ بیچ استعمال نہ کرائیں، غیر معیاری دوا کا استعمال مریض کی بینائی کیلئے خطرناک ہو سکتا ہے۔

الرٹ کے مطابق غیر معیاری اینٹی بائیوٹک استعمال سے مرض پیچیدگی اختیار کر سکتا ہے، فارما کمپنی کومیسٹین آئی ڈراپس کا متاثرہ بیچ سپلائی نہ کرے، کمپنی کومیسٹین آئی ڈراپس کا متاثرہ بیچ مارکیٹ سے واپس اٹھوائے۔

ڈریپ الرٹ میں مزید کہا گیا ہے کہ کیمسٹ کومیسٹین آئی ڈراپس کا متاثرہ بیچ فارما کمپنی کو واپس کریں، ڈریپ کی صوبائی ٹیمیں میڈیسن مارکیٹ میں سرویلنس بڑھائیں۔
 

 

Advertisement