پنجاب ڈینگی کے نشانے پر، مزید 79 کیسز رپورٹ

Published On 28 November,2023 11:51 am

لاہور: (دنیا نیوز) موسم بدل گیا لیکن ڈینگی نے تیور نہ بدلے، گزشتہ 24 گھنٹوں کے دوران صوبہ بھر سے مزید 79 نئے مریضوں میں ڈینگی کی تصدیق ہوئی ہے۔

سیکرٹری ہیلتھ علی جان خان نے کہا ہے کہ لاہور میں گزشتہ 24 گھنٹوں کے دوران 47 افراد میں ڈینگی وائرس کی تصدیق ہوئی، رواں سال پنجاب کے 36 اضلاع میں ڈینگی کے 13 ہزار 938 جبکہ لاہور میں ایک سال کے دوران ڈینگی کے 6 ہزار 307 کیسز سامنے آئے۔

انہوں نے بتایا کہ راولپنڈی میں گزشتہ روز 2، گوجرانوالہ میں 14، ملتان میں 6 اور فیصل آباد میں 5 افراد ڈینگی وائرس کا شکار ہوئے، اسی طرح سرگودھا میں دو، شیخوپورہ، اوکاڑہ اور پاکپتن میں ڈینگی کا ایک ایک نیا مریض سامنے آیا۔

علی جان خان کا مزید کہنا تھا کہ پنجاب بھر کے ہسپتالوں میں اس وقت ڈینگی کے کل 57 مریض زیر علاج ہیں، ضلع لاہور کے ہسپتالوں میں اس وقت ڈینگی کے کل 36 مریض داخل ہیں۔

حکام محکمہ صحت نے کہا ہے کہ ڈینگی سے بچنے کے لئے شہری اپنے ماحول کو صاف اور خشک رکھیں، ڈینگی بخار کے علاج، معلومات یا شکایات کے لئے محکمہ صحت کی فری ہیلپ لائن 1033 پر رابطہ کریں۔

Advertisement