نیویارک : (ویب ڈیسک ) عالمی ادارہ صحت (ڈبلیو ایچ او) نے بھارت میں ایک اور انسان کے برڈ فلو سے متاثر ہونے کی تصدیق کردی۔
عالمی ادارہ صحت نے اپنے بیان میں کہا کہ برڈ فلو سے انسان کے متاثر ہونے کا کیس بھارتی ریاست مغربی بنگال میں پیش آیا جہاں ایک چار سالہ بچے میں H9N2 وائرس کی تصدیق ہوئی۔
ادارے کے مطابق مریض کو فروری میں مسلسل شدید سانس کے مسائل، تیز بخار اور پیٹ میں درد کی وجہ سے مقامی ہسپتال کے آئی سی یو میں داخل کروایا گیا تھا۔
عالمی ادارہ صحت حکام کا کہنا ہے کہ تین ماہ بعد بچے میں برڈ فلو کی تشخیص کے بعد اس کا علاج ہوا، صحتیابی کے بعد انہیں ڈسچارج کردیا گیا ، مریض گھر اور اپنے گرد و نواح میں پولٹری فارم کے قریب رہ رہا تھا، اس حوالے سے بچے کے خاندان کا کوئی فرد ڈاکٹرز کو بہتر طریقے سے علامات نہیں بتا سکا۔
واضح رہے کہ بھارت میں H9N2 برڈ فلو سے انسان کے متاثر ہونے کا یہ دوسرا کیس ہے، اس سے قبل 2019 میں ایک شخص متاثر ہوا تھا۔
