تازہ ترین
  • بریکنگ :- دھند کےباعث موٹروےایم 3سمندری سے درخانہ تک بند،موٹروےپولیس

کشمیریوں کو حق خود ارادیت دینے کے وعدے پر عملدرآمد کیا جائے: پاکستان

Published On 29 January,2021 05:39 pm

نیویارک: (دنیا نیوز) پاکستان نے مطالبہ کیا ہے کہ کشمیریوں کو اقوام متحدہ کی قراردادوں کے مطابق ان کا حق خودارادیت دینے کے وعدے پر عملدرآمد کیا جائے۔

اقوام متحدہ میں پاکستان کے مستقل مندوب منیر اکرم نے اقوام متحدہ کی جنرل اسمبلی میں تنظیم کی کارکردگی پر سیکرٹری جنرل کی سالانہ رپورٹ پر بحث کرتے ہوئے کہا کہ نئے اور پرانے تنازعات کے حل کے لیے سفارتی کوششوں میں اضافہ ضروری ہے۔

انہوں نے کہا کہ نو آبادیاتی نظام کے خاتمے کا عمل اس وقت تک نا مکمل ہوگا جب تک مقبوضہ جموں وکشمیر کے عوام سلامتی کونسل کی متعدد قراردادوں کے مطابق اقوام متحدہ کے زیر نگرانی اپنے حق خودارادیت کا استعمال کرنے کے قابل نہیں ہوجاتے کیونکہ مسئلہ کشمیر کا حل اقوام متحدہ کی قراردادوں میں مضمر ہے۔

منیر اکرم نے کہا کہ بھارت اپنے غیرقانونی زیر تسلط مقبوضہ جموں کشمیر کے عوام کو بنیادی حق سے محروم رکھنے کی اپنی ظالمانہ مہم جاری رکھتے ہوئے کشمیر میں 9 لاکھ بھارتی فوجیوں کے ذریعے بڑے پیمانے پر انسانی حقوق کی خلاف ورزیاں کر رہا ہے، ہزاروں کشمیری سیاسی رہنمائوں کو گرفتار کیا گیا، ہزاروں نوجوان لاپتا ہیں، سینکڑوں ہزار کشمیری شہید ہوئے، ہزاروں زخمی ہوئے اور 20 ہزار کشمیری خواتین کی عصمت دری کی گئی۔

ان کا کہنا تھا کہ بھارت نے کشمیریوں کی آواز کو دبانے کی کوشش کی، لائن آف کنٹرول پر لگاتار سیز فائر کی خلاف ورزیوں اور جارحیت کی دھمکی سے پاکستان کی آواز کو دبانے کی کوشش کی ہے اور یہی نہیں بھارت نے پاکستان کے خلاف دہشت گردی اور بغاوت جاری رکھتے ہوئے فالس فلیگ آپریشن کی منصوبہ بندی بھی کی۔

پاکستانی مندوب نے کہا کہ بھارت کے فروری 2019ء میں چوری چھپے حملے کا حوالہ دیتے ہوئے خبردار کیا کہ چونکہ بھارت کی انتہا پسند حکمران جماعت بی جے پی اور انتہا پسند تنظیم آر ایس ایس کی فاشسٹ حکمرانی کی حامل جنونی سوچ کی مخالفت میں اضافہ ہوا لیکن وہ اقتدار پر اپنی غاصبانہ گرفت برقرار رکھنے کے لیے کچھ بھی کر سکتے ہیں۔

انہوں نے اس بات پر افسوس کا اظہار کیا کہ اقوام متحدہ کے اصولوں اور مقاصد کے احترام میں نمایاں طور پر کمی واقع ہوئی ہے، دنیا بھر میں تنازعات میں اضافہ ہوا، عالمی طاقتوں کے درمیان عالمی اسلحے کی نئی دوڑ شروع ہوئی اور اس کے ساتھ ساتھ غربت اور مشکلات میں اضافہ ہوا ہے۔