اسلام آباد: (دنیا نیوز) شیری رحمان کا کہنا ہے کہ تحریک انصاف ملک میں مسلسل آئینی بحران پیدا کرنے کی کوشش کر رہی ہے، صدر مملکت وزیراعظم کا مشورہ ماننے کے پابند ہیں۔
نائب صدر پیپلزپارٹی و سینیٹر شیری رحمان نے اپنے بیان میں کہا کہ صدر کا وزیراعظم کی بھیجی ہوئی سمری مسترد کرنے کا عمل تشویش ناک اور حیران کن تھا، عارف علوی تحریک انصاف کے کارکن کا کردار ادا کر رہے ہیں، بر طرف گورنر پنجاب نے کئی ماہ سے ملک کے سب سے بڑے صوبے کو مفلوج بنا کر رکھا تھا۔ اُنہیں باعزت طریقے سے مستعفی ہو جانا چاہیے تھا مگر عمر سرفراز چیمہ نے کپتان کی طرح آئینی اختیار کا غلط استعمال کرنا چاہا۔
