خلاصہ
- لاہور: (دنیا نیوز) وزیراعلیٰ پنجاب چودھری پرویز الٰہی کی زیر صدارت 3گھنٹے طویل اجلاس میں سابق وزیراعظم عمران خان کے دور میں ہیلتھ کارڈ پروگرام کو مزید بہتر طریقے سے آگے بڑھانے کا فیصلہ کر لیا گیا۔
وزیراعلیٰ پنجاب کی زیر صدارت اہم اجلاس ہوا، اجلاس میں سابق صوبائی وزیر صحت ڈاکٹر یاسمین راشد،سابق چیئرمین پلاننگ اینڈ ڈویلپمنٹ سلمان غنی،سابق سیکرٹری وزیراعلیٰ جی ایم سکندر، پرنسپل سیکرٹری وزیراعلیٰ محمد خان بھٹی،چیئرمین پلاننگ اینڈ ڈویلپمنٹ، سیکرٹری صحت،وزیرآباد انسٹی ٹیوٹ آف کارڈیالوجی کے سربراہ،ڈی جی ریسکیو1122اور متعلقہ حکام نے اجلاس میں شرکت کی۔
اجلاس میں پنجاب کے تمام ہسپتالوں کی ایمرجنسی وارڈز کو اپ گریڈکرنے کی منظوری دی گئی اور بتایا گیا کہ ایمرجنسی وارڈز میں مریضوں کو تمام ادویات مفت دی جائیں گی۔
وزیراعلیٰ پنجاب نے کہا کہ مریض کا حق ہے کہ اسے ایمرجنسی میں مفت ادویات ملیں -دوسرے مرحلے میں وزیرآباد انسٹی ٹیوٹ آف کارڈیالوجی میں بستروں کی تعداد 400 تک بڑھائی جائے گی- وزیرآباد انسٹی ٹیوٹ آف کارڈیالوجی میں ڈاکٹروں خصوصا اینتھیزیالوجسٹ او رپیرا میڈیکل سٹاف کی کمی کو فی الفور پورا کیاجائے گا-اینتھیزیالوجسٹ کی کمی کو پورا کرنے کے لئے انہیں خصوصی الاؤنس دیں گے-
پرویز الہٰی نے ڈاکٹرز کی استعداد کار میں اضافے کے لئے خصوصی پروگرام شروع کرنے کی ہدایت کر دی اور وزیرآباد انسٹی ٹیوٹ آف کارڈیالوجی کی خالی اراضی پر ڈاکٹروں او رپیرا میڈیکل سٹاف کی رہائش گاہیں بنائی جائیں۔
