لاہور: (دنیا نیوز) لاہور کی عدالت نے جلاﺅ گھیراﺅ اور پولیس پر تشدد کیس میں پی ٹی آئی رہنماؤں کی عبوری ضمانت میں 16 مئی تک توسیع کر دی۔
زمان پارک میں جلاﺅ گھیراﺅ اور پولیس پر تشدد کیس میں پی ٹی آئی رہنماﺅں کی عبوری ضمانتوں پر سماعت ہوئی، پی ٹی آئی رہنما فرخ حبیب، اعجاز چودھری، حماد اظہر اور محمود الرشید عدالت پیش ہوئے۔
عدالت نے فرخ حبیب، میاں محمود الرشید اور اعجاز چودھری کو حاضری لگا کر جانے کی اجازت دے دی۔
رہنما پی ٹی آئی فواد چودھری نے حاضری معافی کی درخواست دائر کی، درخواست میں موقف اختیار کیا گیا کہ فواد چودھری حکومت اور پی ٹی آئی مذاکرات کا حصہ ہیں۔
عدالت نے حماد اظہر سے استفسار کیا کہ آپ بتائیں کب کی تاریخ رکھیں؟ حماد اظہر نے کہا کہ 14 مئی کو الیکشن، 17 کو اسلام آباد پیش ہونا ہے، اس کے بعد کی کوئی تاریخ رکھ دیں،عدالت نے استفسار کیا کہ کیا 14 مئی کو الیکشن ہو رہا ہے؟حماد اظہر نے کہا کہ قانون کے مطابق تو ہیں، باقی سرکار کا پتہ نہیں۔
عدالت نے فواد چودھری کی حاضری معافی کی درخواست منظور کر لی، عدالت نے فواد چودھری، فرخ حبیب، حماد اظہر اور دیگر کی عبوری ضمانت میں 16 مئی تک توسیع کر دی۔
