سپریم کورٹ: پرویز مشرف کا نام ای سی ایل میں شامل کرنے کی نظر ثانی درخواست خارج

Published On 12 September,2023 10:34 am

اسلام آباد: (دنیا نیوز) سپریم کورٹ آف پاکستان نے سابق صدر پرویز مشرف کا نام ای سی ایل میں شامل کرنے کی نظر ثانی درخواست خارج کردی۔

سابق صدر پرویز مشرف کا نام ای سی ایل میں شامل کرنے نظرثانی درخواست پر جسٹس اعجاز الاحسن کی سربراہی میں تین رکنی بینچ نے سماعت کی۔

دوران سماعت جسٹس اعجاز الاحسن نے کہا کہ یہ درخواست تو غیر مؤثر ہوچکی ہے۔

اس پر وکیل توفیق آصف نے کہا کہ مقدمہ 6 سال بعد لگے گا تو غیر مؤثر ہی ہوگا، گزشتہ روز تو فل کورٹ ریفرنس میں بھی مقدمات کی سماعت مقرر نہ ہونے پر بات ہوئی تھی۔

بعدازاں سپریم کورٹ نے نظر ثانی درخواست غیر مؤثر ہونے پر خارج کر دی۔

خیال رہے کہ آئین معطل کرنے اور غداری سمیت متعدد مقدمات کا سامنا کرنے والے سابق صدر پرویز مشرف 5 فروری 2023ء کو انتقال کر گئے تھے۔

Advertisement