لاہور: (دنیا نیوز) نگران وزیراعلیٰ پنجاب محسن نقوی سے اٹلی کے سفیر اینڈریاس فیراریز نے ملاقات کی۔
ملاقات میں ثقافت، سیاحت اورباہمی تجارت کے شعبوں میں تعاون بڑھانے پر تبادلہ خیال کیا گیا۔
اس موقع پر وزیراعلیٰ محسن نقوی کا کہنا تھا کہ پاکستان اور اٹلی کے درمیان باہمی تعلقات کو مفید معاشی پارٹنر شپ میں بدلنے کا وقت آ گیا ہے، تجارتی و ثقافتی وفود کے باہمی تبادلوں سے تعلقات کو نئی جہت ملے گی، پنجاب میں سرمایہ کاروں کے لئے ون ونڈو آپریشن شروع کررہے ہیں۔
محسن نقوی نے کہا کہ ون ونڈو آپریشن کے ذریعے تمام این او سیز ایک چھت تلے میسر ہوں گے، اٹلی کے سرمایہ کاروں کے لئے پنجاب میں انویسٹمنٹ کے بے پناہ مواقع موجود ہیں۔
وزیر اعلیٰ پنجاب نے جی ایس پی پلس سٹیٹس کے لئے اٹلی کی سپورٹ پر اطالوی سفیر کا شکریہ بھی اداکیا۔
اطالوی سفیر اینڈریاس فیراریز کا کہنا تھا کہ پنجاب حکومت کے ساتھ مختلف شعبوں میں جاری تعاون کو فروغ دیں گے۔
