اسلام آباد:(دنیا نیوز) وفاقی وزیر اطلاعات عطا تارڑ نے کہا ہے کہ پانچ قیراط ہیرے کی انگوٹھیوں کا بشریٰ بی بی سے معلوم ہوا۔
سماجی رابطے کے پلیٹ فارم ”ایکس سپیس“ پر 190 ملین پاﺅنڈ میگا کرپشن کیس کے فیصلے کے متعلق اپنے پیغام میں عطا تارڑ کا کہنا تھا کہ اس سے پہلے کبھی نہیں سنا کہ پانچ قیراط ہیرے کی انگوٹھی بھی ہوتی ہے۔
انہوں نے کہا کہ پانچ قیراط ہیرے کی انگوٹھیوں کا بشریٰ بی بی سے معلوم ہوا، عمران خان کی اہلیہ نے فرح گوگی کے ساتھ مل کر لوٹ مار کی، اب بانی پی ٹی آئی کہہ رہے ہیں کہ وہ سیرت پر چل رہے تھے۔
وفاقی وزیر اطلاعات کا کہنا تھا کہ بانی پی ٹی آئی قوم کا 80 ارب روپے ہڑپ کر گئے، 190 ملین پاﺅنڈ کی لوٹی گئی رقم سے انہوں نے لاہور میں گھر بنایا، یہ وہی پیسہ ہے جو ملک ریاض کا انہوں نے استعمال کیا۔
عطا تارڑ کا مزید کہنا تھا کہ پی ٹی آئی کا کوئی ایک شخص عمران احمد نیازی کا ذریعہ آمدن نہیں بتا سکا، عدالت نے 190 ملین پاﺅنڈ کیس میں شریک ملزمان کو اشتہاری ڈیکلیئر کیا ہے۔
