پتوکی :(دنیا نیوز) پنجاب کے علاقے پتوکی میں مین ہول میں گر کرایک خاتون اور ایک نوجوان جاں بحق ہوگئے۔
عینی شاہدین کے مطابق چونیاں روڈ پر امام بارگاہ کے سامنےایک خاتون کھلے گٹرمیں جاگری جسے بچانے کے لیے دو راہگیر نوجوان بھی گٹر میں کود پڑے، خاتون اور دونوں نوجوان گٹر کے اندر پھنس گئے جن کو مقامی افراد نے اپنی مدد آپ کے تحت 15 منٹ کی کوشش کے بعد باہر نکالا۔
ذرائع کے مطابق خاتون اوردونوں نوجوان کو تشویشناک حالت میں تحصیل ہیڈ کوارٹر ہسپتال پتوکی منتقل کر دیا گیا جہاں خاتون اور ایک نوجوان جان کی بازی ہار گئے، دوسری جانب پولیس کا کہنا ہے کہ تشویشناک حالت میں ہسپتال منتقل ہونے والے دوسرے نوجوان کولاہور ریفر کردیا گیا ہے۔
علاوہ ازیں جاں بحق ہونے والوں کے اہل خانہ نے پتوکی ملانوالہ بائی پاس کو بلاک کر کے احتجاج کیا تو عام لوگ بھی شامل ہوگئے جن کا کہنا تھا کہ پتوکی کی مین شاہراہوں پر کھلے درجنوں گٹر شہریوں کے لیے وبال جان بن گئے ہیں۔
