اسلام آباد:(دنیا نیوز) وزیر اعظم شہباز شریف نے وفاقی دارالحکومت میں اوورسیز پاکستانیوں کے مسائل حل کرنے کیلئے خصوصی عدالتوں کے قیام کا اعلان کردیا۔
اسلام آباد میں سمندر پار مقیم پاکستانیوں کے کنونشن سے خطاب کرتے ہوئے شہباز شریف کا کہنا تھا کہ اوورسیز پاکستانیوں کے جذبے اور قربانیوں کو سلام پیش کرتے ہیں، ایک کروڑ سے زائد پاکستانی دنیا کےمختلف ملکوں میں مقیم ہیں۔
انہوں نے کہا کہ کہ اسلام آباد میں اوورسیز پاکستانیوں کے مسائل حل کرنے کے لیے خصوصی عدالتیں قائم کردی گئیں، حکومت نے پنجاب اور بلوچستان میں بھی ایسی عدالتیں قائم کرنے کے لیے اقدامات جاری ہیں۔
وزیر اعظم کا کہنا تھا بیرون ملک مقیم پاکستانیوں نے محنت،لگن اورقربانیوں سےاپنا مقام بنایا، آپ ہمارے سروں کےتاج اور ہمارے ایمبیسڈر ہیں، اوورسیز پاکستانیوں کا دل پاکستان کےساتھ دھڑکتا ہے، بیرون ملک مقیم پاکستانی اپنی محنت سے رزق حلال کما رہے ہیں، بیرون ملک مقیم پاکستانی ملک کا فخرہیں۔
شہبازشریف نے کہا کہ جنرل عاصم منیر کے ہوتے ہوئے کوئی پاکستان کو میلی آنکھ سے نہیں دیکھ سکتا، آرمی چیف کی زبان پر وہی ہوتا ہے جو ان کے دل میں ہوتا ہے، سب جانتے ہیں دہشت گردوں کو کون فنڈنگ کررہا ہے اور دہشت گردی کے تانے بانے کہاں ملتے ہیں، 2018 میں ملک سے دہشت گردی کا خاتمہ ہوچکا تھا۔
ان کا کہنا تھا کہ سپہ سالار عاصم منیر ایک سچے پاکستانی اور زبردست پروفیشنل ہیں، پاکستان کا دفاع مضبوط ہے، ہماری افواج اپنی جان کا نذرانہ دے کر قوم کے مستقبل کومحفوظ بنا رہی ہیں، ماضی کی غلطیوں کی وجہ سے ملک میں دہشت گردی واپس آئی، سوات اور دیگر علاقوں سے دہشت گردوں کو لا کر بسایا گیا۔
وزیراعظم نے کہا کہ اوورسیز پاکستانیوں کے بچوں کی تعلیم کیلئے یونیورسٹیوں میں5 فیصد کوٹہ مختص کیا گیا ہے جبکہ میڈیکل کالجز میں 15 فیصد کوٹہ رکھا گیا گیا ہے، ایف بی آر اوورسیز پاکستانیوں کو لین دین اور بینک معاملات میں بطور فائلرز شمار کرے گا، نیوٹیک بیرون ملک مقیم پاکستانیوں کےبچوں کو ابتدائی ہنرمند بنانے کے لیے کورس کرائے گا۔
شہباز شریف کا کہنا تھا کہ ویڈیولنک کےذریعےتمام مشنز سے شواہد کی ای ریکارڈنگ کی سہولت دی جائےگی، مقدمات کی ای فائلنگ کی سہولت بھی فراہم کر رہے ہیں ، یہ سہولت60 دن میں دی جائےگی۔
انہوں نے مزید کہا کہ میرپور آزاد کشمیرمیں بین الاقوامی ایئرپورٹ کی فیزبیلٹی بنانے کے احکام جاری کر دیئے ہیں، سب سےزیادہ فارن ایکسچینج بھیجنے والوں کو ہر سال 15 سول ایوارڈز دیئےجائیں گے۔
