پشاور: (دنیا نیوز) مشیر اطلاعات خیبرپخونخوا بیرسٹر ڈاکٹر سیف نے کہا ہے کہ صوبے میں پائیدار امن کے قیام کیلئے افغانستان سے بات چیت کا آغاز ناگزیر ہے۔
اپنے بیان میں بیرسٹر سیف کا کہنا تھا کہ مقامی جرگوں کی سفارشات بھی امن کیلئے افغانستان سے مذاکرات کی حمایت کرتی ہیں، افغانستان سے مذاکرات کیلئے صوبائی، وفاقی اور قبائلی عمائدین پر مشتمل ایک مشترکہ جرگے کی تشکیل ضروری ہے۔
انہوں نے کہا کہ افغانستان کو اعتماد میں لئے بغیر ضم شدہ اضلاع سمیت پورے صوبے میں امن کا قیام ممکن نہیں، قیامِ امن میں افغانستان ایک اہم سٹیک ہولڈر ہے، ضم اضلاع کا افغانستان کے ساتھ 2200 کلومیٹر سے زائد طویل سرحدی رابطہ ہے۔
صوبائی مشیر اطلاعات کا کہنا تھا کہ وزیراعلیٰ کی قیادت میں خیبرپختونخوا حکومت امن کے قیام کیلئے سنجیدہ اقدامات کر رہی ہے، اس مقصد کے تحت علی امین گنڈاپور کی سربراہی میں مقامی جرگوں کا سلسلہ جاری ہے، مقامی جرگوں کا یہ سلسلہ اگلے ہفتے تک مکمل کر لیا جائے گا، جس کے بعد ایک گرینڈ جرگہ منعقد کیا جائے گا، گرینڈ جرگے میں پائیدار امن کیلئے جامع سفارشات مرتب کی جائیں گی۔
