لاہور: (دنیا نیوز) لاہور ہائیکورٹ نے پی ٹی اے سے کم عمر بچوں کے سوشل میڈیا استعمال پر تفصیلات طلب کر لیں۔
لاہور ہائیکورٹ میں کم عمر بچوں کے فیس بک اور ٹک ٹاک استعمال پر پابندی کیلئے دائر کی گئی درخواست پر سماعت ہوئی، چیف جسٹس مس عالیہ نیلم نے شہری اعظم بٹ کی درخواست پر سماعت کی اور درخواست گزار کے وکیل سے تفصیل طلب کی۔
درخواست گزار وکیل نے عدالت کو بتایا کہ کم عمر بچے فیس بک اور ٹک ٹاک جیسے سوشل میڈیا پلیٹ فارمز پر نامناسب مواد دیکھتے ہیں جس سے ان کی تعلیمی سرگرمیاں متاثر ہو رہی ہیں۔
وکیل کا کہنا تھا کہ ان سوشل میڈیا ایپلی کیشنز پر بچوں کو غیر مناسب مواد تک رسائی حاصل ہے جس کا ان کی ذہنی اور تعلیمی نشوونما پر منفی اثر پڑ رہا ہے۔
چیف جسٹس نے درخواست گزار سے پی ٹی اے (پاکستان ٹیلی کمیونیکیشن اتھارٹی) کو دی گئی درخواست کی تفصیل طلب کی، چیف جسٹس نے وکیل کو بھی ہدایت کی کہ اس نے پی ٹی اے کو کب درخواست دی اور ادارے نے اسے کب وصول کیا، اس کی تفصیل فراہم کریں۔
