وزیراعظم و فیلڈ مارشل کی امریکی صدر ڈونلڈ ٹرمپ سے ملاقات، تجارت بڑھانے پر زور

واشنگٹن: (دنیا نیوز) وزیراعظم شہبازشریف کی امریکی صدر ڈونلڈ ٹرمپ سے اہم ملاقات ہوئی جس میں تجارت بڑھانے پر زور دیا گیا۔

وائٹ ہاؤس میں ہونے والی ملاقات میں فیلڈ مارشل سید عاصم منیر بھی شریک تھے، امریکی نائب صدر جے ڈی وینس اور وزیر خارجہ مارکو روبیو بھی شامل تھے، پاکستانی اور امریکی رہنماؤں کی ملاقات خوشگوار ماحول میں ہوئی۔

ملاقات میں پاک امریکہ تجارتی تعلقات، توانائی کے منصوبے، موسمیاتی تبدیلی کے اثرات اور خطے کی اقتصادی ترقی پر بھی تفصیلی بات چیت ہوئی۔

ذرائع کے مطابق وزیراعظم شہبازشریف نے امریکا اور پاکستان کے درمیان تجارت بڑھانے پر زور دیا، آئی ٹی اور زراعت کے شعبوں میں سرمایہ کاری کی دعوت دی۔

وزیراعظم کا کہنا تھا کہ امریکی صدر سے ملاقات بہت اچھی رہی، پاکستان ایک بڑی ابھرتی ہوئی تجارتی منڈی ہے، پاکستان کی نوجوان آبادی اور ابھرتی ہوئی معیشت امریکا کیلئے بڑی تجارتی مارکیٹ ہے۔

انہوں نے کہا کہ امریکی صدر ٹرمپ نے پاکستان کے معاشی امکانات کی تعریف کی اور کہا امریکا پاکستانی معیشت کے استحکام کیلئے کردار ادا کرنے کوتیار ہے، دنیا دہشت گردی کے خاتمے میں پاکستان کی کوششوں کو تسلیم کرتی ہے، پاکستان کی سکیورٹی فورسز کی قربانیوں کو سراہتے ہیں۔

ملاقات سے قبل امریکی صدر ڈونلڈ ٹرمپ نے کہا کہ ہمارے پاس ایک عظیم رہنما آ رہے ہیں، ہمارے پاس پاکستان کے وزیرِاعظم آ رہے ہیں اور پاکستان کے فیلڈ مارشل بھی۔

انہوں نے کہا کہ فیلڈ مارشل ایک بہت عظیم شخصیت ہیں اور وزیرِاعظم بھی، دونوں ہی اور وہ آ رہے ہیں بلکہ ہو سکتا ہے وہ اس وقت اسی کمرے میں موجود ہوں۔

ملاقات سے پہلے واشنگٹن ڈی سی کے اینڈریوز ایئر بیس پہنچنے پر وزیرِاعظم شہبازشریف کا ریڈ کارپٹ پر امریکی ایئر فورس کے اعلیٰ عہدیدار نے استقبال کیا، وزیرِاعظم محمد شہبازشریف کا موٹرکیڈ امریکی سکیورٹی کے حصار میں ایئربیس سے روانہ کیا گیا۔

— PTV News (@PTVNewsOfficial) September 25, 2025

اطلاعات کے مطابق وزیراعظم محمد شہبازشریف نیویارک کے جان ایف کینیڈی ایئرپورٹ سے واشنگٹن کیلئے روانہ ہوئے تھے، وزیراعظم شہباز شریف صدر ٹرمپ سے ملاقات کے بعد واپس نیویارک پہنچ گئے جہاں وہ آج اقوام متحدہ کی جنرل اسمبلی اجلاس سے خطاب کریں گے۔