گلگت: (دنیا نیوز) پاک فوج کے شعبہ تعلقات عامہ (آئی ایس پی آر) نے یومِ آزادی گلگت بلتستان کے موقع پر نیا نغمہ ’’پاکستان کی شان، گلگت بلتستان‘‘ ریلیز کر دیا۔
آئی ایس پی آر کی جانب سے جاری کر دہ یہ نغمہ گلگت بلتستان کے نوجوان گلوکاروں کی آواز میں پیش کیا گیا جو وطنِ عزیز سے خطے کے عوام کے گہرے اور لازوال رشتے کی شاندار عکاسی کرتا ہے، نغمے میں اُن بہادر جانثاروں کو خراجِ عقیدت پیش کیا گیا جنہوں نے مادرِ وطن کی حفاظت کیلئے اپنی جانوں کا نذرانہ پیش کیا۔
گیت کے بول اس عزم کا اظہار بھی کرتے ہیں کہ جس نے بھی پاکستان کی جانب میلی نگاہ ڈالی، اُسے ہمیشہ ذلت و رسوائی کا سامنا کرنا پڑا، نغمے میں اس بات کی ترویج کی گئی ہے کہ ہمیں ذاتی اختلافات بھلا کر ملک کے روشن مستقبل کیلئے ایک ہو جانا چاہیے، ہم ایک عظیم قوم ہیں اور اس وطن کی سرفرازی کیلئے ہمیں اتحاد، محبت اور بھائی چارے کی فضا کو قائم کرنا ہوگا۔
یاد رہے کہ یکم نومبر 1947ء گلگت بلتستان کا ڈوگرا راج سے آزادی کی عظیم جدوجہد کا دن ہے، گلگت بلتستان کے عوام کی جدو جہد کا مقصد پاکستان کے ساتھ الحاق تھا، گلگت سکاوٹس اور مقامی جانبازوں نے ڈوگرا راج کے خلاف اعلانِ جنگ کرتے ہوئے مہاراجہ کے کنٹرول کو ختم کیا جس کے بعد گلگت کی فضاؤں میں پہلی بار پاکستانی پرچم لہرایا گیا۔
