پاکستان سمیت دنیا بھر میں آج ٹیلی ویژن ڈے منایا جا رہا ہے

لاہور: (دنیا نیوز) پاکستان سمیت دنیا بھر میں آج ٹیلی ویژن ڈے منایا جا رہا ہے جس کا مقصد بین الاقوامی سطح پر ٹیلی ویژن کی اہمیت، ثقافتی و لسانی فوائد اور عوام میں اس کے استعمال کا شعور اجاگر کرنا ہے۔

دور جدید میں ٹیلی ویژن کی اہمیت کو کسی طور نظر انداز نہیں کیا جا سکتا، گھروں میں خواتین ڈرامہ نہ دیکھیں تو گزارا نہیں ہوتا، بچے کارٹون دیکھتے ہیں تو کسی کو خبروں میں دلچسپی ہے، ٹیلی ویژن ایک ایسی حیرت انگیز ایجاد ہے جو دورحاضر میں رابطے، معلومات اور خبروں تک رسائی کا ایک طاقتور ترین ذریعہ ہے۔

اقوام متحدہ نے 1996ء میں ہر سال 21 نومبر کو ٹیلی ویژن کا عالمی دن منانے کا اعلان کیا تھا، اس دن کو منانے کا مقصد تفریح ، تعلیم و تربیت اور معلومات کے حصول کیلئے ٹیلی ویژن کی اہمیت کو اجاگر کرنا ہے، پاکستان میں 26 نومبر 1964ء میں بلیک اینڈ وائٹ سکرین کے ساتھ ٹی وی کا آغاز ہوا جس کے بعد معلومات، تفریح اور خبروں نے لوگوں کی زندگی میں رنگ بھر دیے۔

پاکستان میں ٹیلی ویژن کی تاریخ اتنی پرانی نہیں، 2000ء سے پہلے پاکستان میں صرف سرکاری ٹیلی ویژن کا طوطی بولتا تھا، اکا دکا نجی چینلز بھی موجود تھے لیکن ان کی وہ مقبولیت نہ تھی، تاہم پھر دیکھتے ہی دیکھتے نجی ٹی وی چینلز کی ایسی دوڑ شروع ہوئی کہ نیوز چینلز سے لے کر سپورٹس، انٹرٹینمنٹ سمیت چھوٹے بڑے چینلز کی لائن لگ گئی۔

آج لوگ ٹی وی چینلز دیکھنے کے اتنے عادی ہو چکے ہیں کہ اس کے بغیر گزارا مشکل نظر آتا ہے۔