پشاور: (دنیا نیوز) سی ٹی ڈی بنوں ریجن اور بنوں پولیس نے میراخیل کے علاقے میں انٹیلیجنس بیسڈ آپریشن کیا جس میں 2 دہشتگرد ہلاک ہوگئے۔
سی ٹی ڈی حکام کے مطابق ہلاک دہشتگردوں کی شناخت سہیل عرف سنگری اور اسماعیل عرف عثمان کے نام سے ہوئی ہے، ہلاک دہشتگرد پولیس چیک پوسٹ شیخ لنڈک اور فتح خیل پر حملے میں ملوث تھے جس میں 8 پولیس کانسٹیبل زخمی ہوئے تھے۔
سی ٹی ڈی نے بتایا کہ ہلاک دہشتگرد سکیورٹی فورسز کے قافلے پر حملوں سمیت زیر تعمیر ریسکیو 1122 بلڈنگ میں آئی ای ڈی حملے میں بھی ملوث تھے، ہلاک دہشت گردوں سے 2 کلاشنکوف، پستول، متعدد کارتوس، موٹرسائیکل، موبائل فونز، کالعدم تنظیم ٹی ٹی پی کا کارڈ برآمد کر لیا۔
سی ٹی ڈی حکام نے مزید بتایاکہ دو دہشت گرد رات تاریکی کا فائدہ اٹھاتے ہوئے فرار ہوگئے، آئی جی خیبر پختونخوا پولیس ذولفقار حمید اور ایڈیشنل آئی جی سی ٹی ڈی نے کامیاب کارروائی پر مقامی پولیس اور سی ٹی ڈی سپیشل ویپنز اینڈ ٹیکٹکس ٹیموں کو شاباش دی۔
آئی جی کے پی کا کہنا ہے کہ مٹی کی حفاظت کیلئے دہشتگردوں کے خلاف سینہ سپر جوان ملک عزیز کا سرمایہ ہیں۔
