پی ڈی ایم اے کے مطابق صوبے کے بالائی اضلاع میں 20 سے 23 جنوری کے دوران گرج چمک کے ساتھ بارش اور برفباری متوقع ہے۔

چترال، سوات، دیر، کوہستان اور گلیات میں برفباری کے باعث سڑکیں بند یا پھسلن کا شکار ہونے کا خدشہ ہے، میدانی اضلاع صوابی، مردان، چارسدہ، نوشہرہ اور بنوں میں بھی بارش کا امکان ہے۔

پی ڈی ایم اے کے مطابق بارشوں کے بعد میدانی علاقوں میں دھند اور درجہ حرارت میں نمایاں کمی متوقع ہے، پہاڑی علاقوں میں لینڈ سلائیڈنگ اور برفانی تودے گرنے کا خطرہ ہے۔

ضلعی انتظامیہ اور متعلقہ اداروں کو پی ڈی ایم اے کی جانب سے پیشگی اقدامات کے لیے الرٹ جاری کیا گیا اور نکاسیٔ آب کے نظام کو فعال رکھنے اور بل بورڈز محفوظ بنانے کی ہدایت کی گئی ہے۔

پی ڈی ایم اے کا کہنا ہے کہ سیاح برفباری کے دوران پانی، خوراک، ادویات اور گرم کپڑے ساتھ رکھیں، کسی بھی ہنگامی صورتحال میں پی ڈی ایم اے ہیلپ لائن 1700 پر رابطہ کریں۔