ترجمان سینٹرل ریجن سید عمران احمد کے مطابق موٹروے ایم 2 لاہور سے کوٹ مومن، لاہور سیالکوٹ موٹروے ایم 11 اور لاہور ایسٹرن بائی پاس کو دھند کی وجہ سے بند کر دیا گیا ہے۔

سید عمران احمد نے بتایا کہ موٹروے ایم 3 فیض پور سے رجانہ، موٹروے ایم 4 پنڈی بھٹیاں سے گوجرہ تک بند کر دی گئی ہے۔

ترجمان سینٹرل ریجن کا کہنا تھا کہ موٹرویز کی بندش کا مقصد عوام کی جان و مال کا تحفظ ہے، قومی شاہراہوں پر شدید دھند کے باعث حدِ نگاہ خطرناک حد تک کم ہے۔

انہوں نے کہا کہ دھند کے باعث موٹر ویز کی بندش سے ٹریفک کا غیر متوقع دباؤ قومی شاہراہوں پر منتقل ہو گیا، موٹروے پولیس قومی شاہراہوں پر ٹریفک کے بہاؤ کو یقینی بنا رہی ہے۔

سید عمران احمد نے کہا کہ قومی شاہراہوں پر دھند کا پیٹرن تبدیل ہے، ٹکڑوں کی صورت میں دھند مشاہدہ میں آ رہی ہے، ٹکڑوں میں اچانک دھند دیکھنے کی صلاحیت کو متاثر کر سکتی ہے، ٹکڑوں میں دھند ڈرائیونگ کے لیے انتہائی خطرناک ثابت ہو سکتی ہے۔

انہوں نے کہا کہ دھند کے دوران غیر ضروری سفر اپنے اور دوسروں کے لیے خطرے کا سبب بن سکتا ہے، موٹر وے پولیس نے شہریوں سے اپیل کی ہے کہ دھند میں سفر نہ کریں، محفوظ رہیں۔

ترجمان سینٹرل ریجن نے کہا کہ صرف دن کے وقت سفر کریں تاکہ بحفاظت اپنے گھروں کو پہنچ سکیں، بہترین اور محفوظ سفری وقت صبح 10 بجے سے شام 6 بجے تک ہے۔

سید عمران احمد نے کہا کہ دھند میں تیز رفتاری اور غیر ضروری سفر حادثات اور قیمتی جانوں کے ضیاع کا سبب بن سکتا ہے۔