وزیراعلیٰ سندھ مراد علی شاہ کی زیر صدارت ہونے والے صوبائی کابینہ کے اجلاس میں بتایا گیا کہ سانحہ گل پلازہ سے متاثر ہونے والے دکانداروں کو 5،5 لاکھ روپے کچن اور یوٹیلیٹی اخراجات کے لیے کمشنر کے ذریعے ادا کیے جا رہے ہیں۔

اجلاس میں سندھ کابینہ نے متاثرہ دکانداروں کو ایک، ایک کروڑ روپے بلاسود قرض فراہم کرنے کی بھی منظوری دی۔

وزیراعلیٰ مراد علی شاہ نے اس موقع پر کہا کہ متاثرین کو ہر ممکن ریلیف فراہم کرنا ہم سب کی مشترکہ ذمہ داری ہے، یہ قرض متاثرہ دکانداروں کو دوبارہ کاروبار شروع کرنے کے لیے دیا جا رہا ہے جبکہ ایک کروڑ روپے پر واجب الادا سود حکومت سندھ خود ادا کرے گی۔

مراد علی شاہ نے مزید کہا ہے کہ تمام متاثرہ دکانداروں کو دو ماہ کے اندر کاروبار کی بحالی کے لیے دکان کی سہولت فراہم کی جائے گی اور دکانداروں کے تحفظ اور سہولت کے لیے ہر ممکن اقدامات کیے جائیں گے۔