خلاصہ
- اسلام آباد: (دنیا نیوز) اقوام متحدہ کے اعلیٰ سطحی وفد نے این ڈی ایم اے ہیڈکوارٹرز میں قائم نیشنل ایمرجنسیز آپریشن سینٹر (این ای او سی) کا دورہ کیا، جہاں وفد کو جدید ڈیزاسٹر مینجمنٹ نظام، پیشگی انتباہی نظام اور قدرتی آفات سے نمٹنے کے اقدامات پر بریفنگ دی گئی۔
وفد کی قیادت اقوام متحدہ کے نائب سیکرٹری جنرل برائے فلاحی امور و ایمرجنسی ریلیف کوآرڈینیٹر ٹام فلیچر نے کی۔ این ڈی ایم اے حکام نے وفد کو آفات سے نمٹنے، پیشگی آگاہی کے نظام، قومی وسائل کے مؤثر استعمال اور بروقت ردعمل سے متعلق تفصیلی آگاہ کیا۔
— NDMA PAKISTAN (@ndmapk) July 15, 2026
چیئرمین این ڈی ایم اے لیفٹیننٹ جنرل انعام حیدر ملک نے مختلف ممالک کے درمیان تعاون اور تجربات کے تبادلے کی اہمیت پر زور دیتے ہوئے کہا کہ قدرتی آفات سے مؤثر انداز میں نمٹنے کے لیے بین الاقوامی اشتراک ناگزیر ہے۔
وفد کو سال 2026 کے دوران پاکستان اور دیگر ممالک کو درپیش ممکنہ خطرات سے متعلق بھی تفصیلی بریفنگ دی گئی۔
اقوام متحدہ کے وفد نے پاکستان کے نیشنل ایمرجنسیز آپریشن سینٹر اور آفات سے نمٹنے کے جدید نظام کو سراہا، پاکستان کے ساتھ مل کر آفات سے بچاؤ اور مؤثر عملی اقدامات کے لیے تعاون مزید بڑھانے کے عزم کا اعادہ کیا۔
