لاہور (دنیا نیوز) ملک بھر میں بڑھتے ہوئے کرونا وائرس کے کیسز کی تعداد کے بعد عوام کو آگاہی دینے کے لیے حکومت پاکستان نے باضابطہ سرکاری ویب سائٹ لانچ کردی۔
تفصیلات کے مطابق وفاقی دارالحکومت اسلام آباد میں وزیراعظم کی معاون خصوصی برائے اطلاعات فردوس عاشق اعوان، معاون خصوصی برائے صحت ڈاکٹر ظفر مرزا اور پاک فوج کے ترجمان میجر جنرل بابر افتخار نے مشترکہ پریس کانفرنس کی۔
پریس کانفرنس کے دوران وزیراعظم کے معاون خصوصی برائے صحت ڈاکٹر ظفر مرزا کا کہنا تھا کہ عوام کو کرونا وائرس کے حوالے سے تازہ ترین اور مصدقہ اطلاعات پہنچانے کیلئے حکومت پاکستان نے سرکاری ویب سائٹ تیار کرلی ہے۔
انہوں نے بتایا کہ http://covid.gov.pk پر عوام پورے پاکستان میں کرونا وائرس کی موجودہ صورتحال کے ساتھ ساتھ حفاظتی اقدامات اور ہنگامی حالات سے نمٹنے کے حوالے سے معلومات بھی حاصل کرسکیں گی۔
