واٹس ایپ صارفین کی پرائیویسی میں اضافے کیلئے نیا فیچر متعارف

Published On 12 November,2023 10:22 am

کیلیفورنیا: (ویب ڈیسک) انسٹنٹ میسجنگ ایپلی کیشن واٹس ایپ صارفین کی پرائیویسی پر ایک اور جہت کا اضافہ کرنے کیلئے نیا فیچر متعارف کرانے جا رہی ہے۔

یہ فیچر دوران واٹس ایپ کال صارفین کے آئی پی ایڈریس کی حفاظت کرتے ہوئے ان کی لوکیشن کو افشا ہونے سے روکے گا۔

اس فیچر کے تحت صارفین کی تمام کالز کا براہ راست رابطہ قائم ہونے کے بجائے واٹس ایپ کے سرور سے گزر کر رابطہ قائم ہوا کرے گا، جس کا مطلب ہے کہ صارف کی آئی پی اس شخص پر ظاہر نہیں ہوگی جس کو کال ملائی جا رہی ہوگی۔

گروپ کالز واٹس ایپ کی طے شدہ سیٹنگز کے تحت پہلے ہی سرور سے ہو کر گزرتی ہیں اس لئے صارفین کو انفرادی کال کے دوران آئی پی چھپانے کیلئے سیٹنگ میں جا کر یہ آپشن آن کرنا پڑے گا۔

صارفین سیٹنگز میں پرائیویسی میں جا کر ایڈوانسڈ آپشن میں جا کر پروٹیکٹ آئی پی ایڈریس اِن کالز کے آپشن کا انتخاب کر سکتے ہیں، آپشن کو آف کرنے کیلئے بھی یہی طریقہ کار استعمال کرنا ہوگا۔

دوسری جانب واٹس ایپ کی جانب سے مزید یہ بتایا گیا کہ نئے فیچر کو آن کرنے کے بعد کال کا معیار متاثر ہوگا۔

کال کے واٹس ایپ سرور سے گزرنے کی وجہ سے معیار میں کمی واقع ہوگی، لیکن کی جانے والی تمام کالز اینڈ ٹو اینڈ انکریپٹڈ ہوں گی لہٰذا ان کو کوئی نہیں سن سکے گا۔

Advertisement