ریاض: (ویب ڈیسک) سعودی عرب میں ڈاکٹرز نے آپریشن کرکے لڑکی کے پیٹ سے حیران کن طور پر 2 کلوگرام بال نکال کر سالوں کا درد ختم کر دیا۔
عالمی خبر رساں ادارے کے مطابق سعودی عرب کے ایک ہسپتال میں میڈیکل ٹیم نے 20 سالہ لڑکی کے پیٹ سے حیران کن طور پر بالوں کا گچھا نکال لیا جس کا وزن دو کلو گرام تھا۔
خبر رساں ادارے کے مطابق لڑکی سالوں سے پیٹ درد میں مبتلا تھی اور آپریشن تک درد کی وجہ معلوم نہیں ہوسکی تھی، درد بڑھنے پر لڑکی کو طائف کے کنگ عبدالعزیز ہسپتال لایا گیا جہاں بڑے پیمانے پر طبی معائنہ کیا گیا اور مختلف ٹیسٹ کیے گئے جس کے نتیجے میں آخرکار درد کا سبب بننے والے عوامل کا پتہ لگا لیا گیا۔
ترجمان سٹی ہیلتھ ڈپارٹمنٹ عبدالہادی کا کہنا ہے کہ معائنے کے بعد ایک عجیب و غریب شے لڑکی کے پیٹ میں پائی گئی جس کے وزن نے سب کو حیرت زدہ کردیا۔
حکام کا کہنا ہے کہ عجیب چیز کا پتہ چلنے پر میڈیکل ٹیم نے ہنگامی بنیادوں پر سرجری کا فیصلہ کیا فوری طور پر آپریشن کر کے پیٹ سے بالوں کا ایک مربوط گچھا نکال لیا جو کہ آنتوں اور پیٹ کے دیگر حصوں کے ساتھ ایک دیوار کی طرح چپکا ہوا تھا۔
بال نکالنے کے بعد لڑکی کا سالوں سے ہونا والا پیٹ کا درد ختم ہوگیا اور پیٹ کے بھاری پن سے بھی جان چھوٹ گئی تاہم اسے اب بھی ماہر ڈاکٹرز کی زیر نگرانی اسپتال میں رکھا گیا ہے۔
