کوئٹہ: (دنیا نیوز) کوئٹہ میں ہمت اور جذبے کی اعلیٰ مثال قائم کرتے ہوئے ایک بزرگ شہری نے پہاڑ کو کاٹ کر جاگنگ ٹریک بنا دیا۔
کوئٹہ کے علاقے مری آباد کے رہائشی بزرگ شہری علی یاور نے اپنے علاقے میں ایک پہاڑ میں جاگنگ ٹریک بنانے کا بیڑا اٹھایا، دن میں کئی کئی گھنٹے کام کر کے بالآخر ساڑھے 3 سال کے عرصہ میں تین کلو میٹر سے زائد ٹریک بنالیا۔
ماضی میں کان کنی کے پیشہ سے وابستہ علی یاور کا کہنا ہے کہ ساڑھے تین سال میں کئی بار کام کے دوران اس کے ہاتھوں سے خون نکلا اور چھالے بھی پڑے لیکن اس نے ہمت نہیں ہاری اور اپنا کام جاری رکھا۔
ان کا کہنا تھا کہ لوگ ادھر واک کیلئے آتے تھے لیکن راستہ نہیں تھا، میں لوگوں کو دیکھتا تھا تو بہت تکلیف ہوتی تھی، پھر میں نے سوچا کہ راستہ بناؤں لوگ دعائیں دیں گے، اس لئے پہلے نیچے کا راستہ بنایا، اس کی تکمیل کے بعد پہاڑوں کے دامن میں کام شروع کیا اور وہاں بھی تین کلو میٹر یا اس سے تھوڑا زیادہ راستہ بنالیا۔
بزرگ شہری کا کہنا تھا کہ مشکلات تو بہت تھیں، بعض اوقات میں پتھر کو چھوڑ دیتا تھا کیونکہ میرے ہاتھوں سے خون بہہ رہا ہوتا تھا، روتا تھا اور اللہ سے دعا کرتا تھا کہ وہ مجھے توفیق دے کہ میں راستہ بنا سکوں۔
کوئٹہ کا یہ باہمت اور بلند حوصلہ شہری علی یاور پیراں سالی کی وجہ سے بے روزگار ہے تاہم اس کا جذبہ دیکھ کر لگتا یہی ہے کہ اس کی جوانی لوٹ آئی ہے۔
