دبئی : (ویب ڈیسک) اماراتی پولیس نے متعدد اسرائیلی شہریوں کو قتل کے الزام میں گرفتار کر لیا ہے، ان پر اپنے ہی ایک ہم وطن کی ہلاکت کا الزام عائد کیا گیا ہے۔
اماراتی میڈیا کی رپورٹ کے مطابق دبئی پولیس کا کہنا ہے کہ اس نے متعدد اسرائیلی شہریوں کو گرفتار کیا ہے، یہ سب ایک اور اسرائیلی شہری پر حملہ آور ہوئے تھے اور انھوں نے اس کو جان سے مار دیا ہے۔
بیان میں مزید کہا گیا ہے کہ ملزمان کو مزید قانونی کارروائی کے لیے دبئی پبلک پراسیکیوشن کے حوالے کیا جائے گا، اس واقعہ کے پس پردہ حالات ابھی تک واضح نہیں ہیں لیکن متحدہ عرب امارات کے اہم سیاحتی مرکز دبئی میں پرتشدد جرائم شاذ و نادر ہی ہوتے ہیں۔
دوسری جانب اسرائیلی وزارتِ خارجہ کے ترجمان کا کہنا ہے کہ دبئی میں 30 سالہ اسرائیلی شہری کو چاقو کے وار کر کے قتل کر دیا گیا ہے، مقامی حکام اس معاملے کی تحقیقات کر رہے ہیں۔
واضح رہے کہ متحدہ عرب امارات اور اسرائیل نے 2020 میں امریکا کی ثالثی میں معمول کے تعلقات قائم کرنے کے لیے معاہدۂ ابراہیم پر دست خط کیے تھے، اس کے بعد سے یواے ای میں سینکڑوں اسرائیلی شہریوں کو زائرین اور مکین کے طور پر خوش آمدید کہا گیا ہے۔
