واشنگٹن: (دنیا نیوز) امریکی صدر ڈونلڈ ٹرمپ کی مقبولیت دوسری مدت صدارت کے 10 ماہ بعد اپنی کم ترین سطح پر پہنچ گئی جوکہ 2021ء میں عہدہ چھوڑنے کے بعد سے اب تک کے سب سے نچلے درجے پر ہے۔
گیلپ سروے کی رپورٹ کے مطابق حالیہ ماہ میں ریکارڈ کیے گئے گیلپ سروے میں امریکی صدر ڈونلڈ ٹرمپ کی مقبولیت 36 فیصد رہ گئی ہے، ریپبلکنز کی حالیہ الیکشن میں ہار اور شٹ ڈاؤن کے باعث امریکی صدر کی مقبولیت میں کمی ہوئی۔
رپورٹ کے مطابق ٹرمپ کی مقبولیت کی شرح 36 فیصد ہے جبکہ 60 فیصد عوام نے جنوری میں وائٹ ہاؤس واپسی کے بعد ان کی کارکردگی کو نامناسب قرار دیا ہے، یہ شرح جولائی کے مقابلے میں ایک پوائنٹ کم ہے، حالانکہ سروے کے مطابق اس دوران ٹرمپ کی مقبولیت 40 سے 41 فیصد کے درمیان مستحکم رہی تھی۔
گیلپ سروے کے مطابق اگرچہ ڈیموکریٹس کی بڑی تعداد ٹرمپ کی کارکردگی کو ناپسند کرتی ہے، لیکن ریپبلکنز اور آزاد ووٹرز میں بھی قبولیت کی شرح میں کمی دیکھی گئی ہے، اکتوبر کے آخر سے ریپبلکنز کی حمایت 7 پوائنٹ گر کر 84 فیصد رہ گئی، جبکہ آزاد ووٹرز میں قبولیت 33 فیصد سے کم ہو کر اب 25 فیصد رہ گئی ہے۔
سروے کے مطابق جرائم سے متعلق ان کی پالیسی کو سب سے زیادہ 43 فیصد عوام نے سراہا، 41 فیصد نے خارجہ پالیسی کو مناسب قرار دیا اور 39 فیصد نے ان کی تجارتی پالیسی سے اتفاق ظاہر کیا۔
