ریاض: (دنیا نیوز) سعودی ولی عہد شہزادہ محمد بن سلمان کی زیر صدارت کابینہ کے اجلاس میں صنعتی شعبے کے غیر ملکی کارکنوں کی اقامہ فیس ختم کرنے کی منظوری دے دی گئی۔
سعودی میڈیا کے مطابق کابینہ کے اجلاس میں صنعتی شعبے کے غیر ملکی کارکنوں کی اقامہ فیس ختم کرنے کی منظوری کا فیصلہ اقتصادی و ترقیاتی امور کی کونسل کی سفارش کی بنیاد پر کیا گیا، یہ فیصلہ دانشمند قیادت کی جانب سے صنعتی شعبے کو فراہم کی جانے والی مسلسل سرپرستی کا تسلسل ہے۔
رپورٹ کے مطابق یہ فیصلہ سعودی ولی عہد و وزیر اعظم شہزادہ محمد بن سلمان کی اس کاوش کی عکاسی بھی کرتا ہے جس کا مقصد قومی صنعت کو مضبوط بنانا اور عالمی سطح پر اس کی پائیداری اور مسابقت کو فروغ دینا ہے۔
صنعتی شعبے سے وابستہ غیر ملکی کارکنوں کی فیس کا خاتمہ وژن 2030ء کے اہداف کے حصول کی جانب سٹریٹجک قدم قرار دیا جاتا ہے جس کے ذریعے مضبوط، لچکدار اور مسابقتی صنعتی معیشت کی تشکیل مقصود ہے کیونکہ صنعت قومی آمدنی کے ذرائع میں تنوع اور تیل کے بغیر معیشت کے فروغ کیلئے بنیادی ستون سمجھی جاتی ہے۔
