ایرانی وزارت خارجہ کے ترجمان اسماعیل بقائی نے کہا کہ باہمی معاہدے کی خلاف ورزیاں جاری رہیں تو کوئی بات چیت نہیں ہو گی، امریکی سکیورٹی کی ناکامی کے بعد خطے میں نئے معاہدے ہو رہے ہیں۔

انہوں نے مزید کہا کہ تیسری قوت مداخلت نہ کرے تو آبنائے ہرمز کو کھولا جا سکتا ہے، امریکا مشرق وسطی میں عدم استحکام کا ذمہ دار ہے۔ 

ایرانی وزارت خارجہ کے ترجمان نے کہا کہ خطے کے ممالک ایران کے خلاف اپنی سرزمین استعمال نہ ہونے دیں، نیا علاقائی اتحاد ظاہر کرتا ہے کہ امریکی سکیورٹی گارنٹی قابل اعتبار نہیں۔

اسماعیل بقائی نے کہا کہ خطے کے ممالک جان گئے ہیں سکیورٹی جھوٹے بروکروں سے خریدی جانے والی کوئی شے نہیں ہے، حقائق پر مبنی اور دشمن کی درست نشاندہی کرنے والا ہر معاہدہ علاقائی سلامتی کے لیے اہم ہے۔

ایرانی وزارت خارجہ کے ترجمان نے کہا کہ درست حکمت عملی سے خطے میں عدم استحکام کی روک تھام ممکن ہے۔

انہوں نے بتایا کہ ایران اور امریکا کے درمیان براہ راست مذاکرات نہیں ہو رہے، ثالثوں کے ذریعے رابطے جاری ہیں، ایران اور عمان کے درمیان مذاکرات جاری ہیں، آبنائے ہرمز کے ٹرانزٹ روٹ پر اتفاق ہوچکا ہے۔

اسماعیل بقائی نے کہا کہ عمان کے ساتھ مشترکہ اعلامیے پر بات چیت جاری ہے، آبنائے ہرمز سے محفوظ آمدورفت یقینی بنانے کے لیے ضروری طریقہ کار بھی وضع کیے جائیں گے، ایران اب بھی جنگ کی حالت میں ہے۔