پشاور: (دنیا نیوز) پاکستان میں امریکی سفیر ڈونلڈ بلوم نے خیبر پختونخوا کے نئے ضم شدہ ضلع جُنوبی وزیرستان میں کثیر المقاصد آبی ذخیرے گومل زام ڈیم کا دورہ کیا۔
اس موقع پر واپڈا کے چیئرمین لیفٹیننٹ جنرل ریٹائرڈ سجاد غنی اور خیبر پختونخوا کے سیکریٹری زرعی تجارت محمد جاوید مروت بھی اُن کے ہمرا ہ تھے۔
— WAPDA (@wapda_pr) June 20, 2023
واضح رہے کہ گومل زام ڈیم امریکہ اور پاکستان کی حکومتوں کا تکمیل کردہ مشترکہ منصوبہ ہے ، جس کے قابل قدر نتائج برآمد ہوئے ہیں، امریکہ پاکستان سبز اتحاد لائحہ عمل کے تحت دونوں ممالک پانی کے بہتر انتظام و انصرام، شفاف توانائی کی دستیابی اور موسمیاتی تبدیلیوں سے ہم آہنگ زرعی اقدامات یقینی بنانے پر کام کر رہے ہیں۔
منصوبہ کی تکمیل کی بددولت علاقہ میں ایک لاکھ 91 ہزار ایکڑ زمین مقامی کاشتکاروں کو دستیاب ہونے سے زرعی پیداوار دوگنا ہوگئی ہے ، مزید برآں گومل زام ڈیم 30 ہزار خاندانوں کو ممکنہ سیلاب سے تحفظ فراہم کرنے کا بھی ذریعہ ثابت ہوا ، پاکستان کی مجموعی قومی آبی ذخیرہ صلاحیت میں بھی حیران کُن اضافہ ہوا ہے جبکہ 20 ہزار گھروں کو بجلی بھی مہیا ہوئی ہے۔
اس موقع پرامریکی سفیر بلَوم نے کہا کہ امریکہ کو حکومتِ پاکستان کے ساتھ اس 130 ملین ڈالر کے کثیر المقاصد گومل زام ڈیم منصوبے ، بشمول آبی ذخیرہ ، نہری ڈھانچہ اور مقامی برادریوں کو براہ راست آبپاشی سہولیات کی فراہمی سمیت مختلف پہلوؤں میں معاونت کرنے پر فخر ہے۔
واضح رہے کہ گومل زام ڈیم تربیلا اور منگلا ڈیمو ں کے بعد پاکستان میں امریکی اعانت سے پایہ تکمیل تک پہنچنے والا تیسرا بڑا آبی ذخیرہ ہے اور اس کا پاکستان میں موسمیاتی تبدیلی سے نمٹنے کی حکمت عملی اور مجموعی غذائی تحفظ کے سلسلہ میں کلیدی کردار ہے۔
یہ بھی پڑھیں: سعودیہ نے مہمند ڈیم پراجیکٹ کیلئے پاکستان کو 240 ملین ڈالر کا قرضہ دیدیا
خیال رہے کہ 17 میگا واٹ کے اضافی بجلی پیداوار کے ساتھ ڈیم قابل بھروسہ، شفاف توانائی کے حصول کا ذریعہ ہونے کے علاوہ کاشتکاروں کو معاشرتی اور معاشی حالات کی بہتری کے لیے بااختیار بنا رہا ہے۔
امریکی ادارہ برائےبین الاقوامی ترقی ( یو ایس ایڈ) نے آبی ذخیرہ، آبپاشی نظام اور زرعی ترقی کے پہلوؤں میں 130 ملین ڈالر کی سرمایہ کاری کی ہے، پاکستان کی وفاقی اور خیبر پختونخوا کی صوبائی حکومت نے بھی منصوبہ کی لاگت میں برابر کاحصہ ڈالا ہے۔
