اسلام آباد:(دنیا نیوز) وفاقی وزیر برائے پٹرولیم علی پرویز ملک نے عہدے کا چارج سنبھال لیا۔
وزارت آمد پر سیکرٹری پٹرولیم مومن آغا و دیگر حکام نے استقبال کیا، وفاقی وزیر علی پرویز ملک نے اہم اجلاس کی صدارت کی اور وزارت کے اداروں، ذمہ داریوں کے حوالے سے جامع بریفنگ کی ۔
اجلاس کے دوران انہوں نے سحر و افطار میں گیس فراہمی یقینی بنانے کے لیے سخت ہدایات جاری کیں ،حکام نے موجودہ تیل اور گیس کے ذخائر، سپلائی چین، ڈیمانڈ سپلائی پروجیکشن سے وزیر پٹرولیم کو آگاہ کیا۔
اجلاس کے دوران وزارت پٹرولیم کے جاری منصوبوں اور مستقبل کے لائحہ عمل پر تفصیلی گفتگو ہوئی۔
علی پرویز ملک نے کا اپنی گفتگو میں کہنا تھا کہ پٹرولیم کے شعبے کو درپیش چیلنجز سے نمٹنا اولین ترجیح ہے، توانائی کا شعبہ شہہ رگ کی حیثیت رکھتا ہے، عوام پر بوجھ کم کرنے کے لیے تمام وسائل بروئے کار لائیں گے۔
انہوں نے مزید کہا کہ پٹرولیم و منرل سیکٹر میں بیرونی سرمایہ کاری ملک کے لیے خوش آئند ہے، تیل وگیس کی مقامی پیداوار میں اضافے سے عوام کو ریلیف ملے گا۔
