اسلام آباد: (دنیا نیوز) وفاقی حکومت نے پٹرولیم مصنوعات کی قیمتیں برقرا ر رکھنے کے اعلان کے بعد پٹرول اور ڈیزل پر عائد فی لیٹر لیوی میں مزید اضافہ کر دیا۔
وزارت خزانہ سے جاری نوٹیفکیشن کے مطابق پٹرول پر لیوی 60 سے بڑھا کر 70 روپے فی لیٹر کر دی گئی، ڈیزل پر بھی لیوی 10 روپے فی لیٹر بڑھائی گئی، ڈیزل پر لیوی 60 روپے سے بڑھا کر 70 روپے کر دی گئی ہے۔
لائٹ ڈیزل پر لیوی 7 روپے 75 پیسے فی لیٹر، ہائی اوکٹین پر لیوی 50 روپے فی لیٹر کر دی گئی، لیوی بڑھانے سے 16 دنوں میں 50 ارب روپے کی آمدن متوقع ہے، لیوی بڑھانے سے موصول اضافی رقم بجلی کے بلوں میں ریلیف پر خرچ ہوگی۔
وزارت خزانہ کے نوٹیفکیشن کے مطابق پٹرول اور ڈیزل پر لیوی میں اضافے کا اطلاق آج سے ہوگیا۔
یاد رہے کہ وفاقی حکومت نے مالی سال 2025 کے وفاقی بجٹ میں پٹرولیم لیوی کو 60 روپے فی لیٹر سے بڑھا کر 80 روپے کرنے کا اعلان کیا تھا، تاہم حکومت نے وقفے وقفے سے 20 روپے فی لیٹر پٹرولیم لیوی عائد کرنے کا فیصلہ کیا تھا۔
دوسری جانب حکومت نے آئندہ 15 روز کیلئے پٹرولیم مصنوعات کی قیمتیں برقرار رکھنے کا اعلان کیا ہے۔
