کراچی: (دنیا نیوز) پاکستان نے بھارت کے لیے اپنی فضائی حدود مزید ایک ماہ تک بند رکھنے کا فیصلہ کر لیا۔
بھارتی ایئرلائنز کے لیے 23 اگست تک پاکستان کی فضائی حدود بند رہے گی، پاکستان ایئرپورٹ اتھارٹی نے نیا نوٹم جاری کردیا۔
واضح رہے کہ پاک بھارت کشیدگی کے بعد پاکستان نے 23 اپریل کو پاکستانی فضائی حدود بھارتی طیاروں کے لیے بند کی تھی جس میں متعدد بار توسیع کی جا چکی ہے۔
پاکستانی فضائی حدود کی بندش سے بھارتی پروازوں کے یومیہ اخراجات میں لاکھوں ڈالر اضافہ ہوگیا، فضائی بندش سے قبل 100 سے زائد بھارتی پروازیں روزانہ پاکستانی فضائی حدود استعمال کرتی تھیں۔
دوسری جانب بھارت کی جانب سے بھی جوابی طور پر پاکستانی طیاروں کے لیے اپنی فضائی حدود بند کی گئی ہے۔
