لاہور: (دنیا نیوز) ملک بھر میں سوئی گیس کنکشن پر عائد پابندی ختم کرنے کا فیصلہ کر لیا گیا، قدرتی گیس کی بجائے ایل این جی کی بنیاد پر گیس کنکشن فراہم کیے جا سکیں گے۔
ذرائع نے بتایا کہ سوئی ناردرن کمپنی نےایل این جی بنیاد پر کنکشن کے لیے تجاویز وفاق کو بھجوا دیں، درآمد شدہ ایل این جی پر کنکشن کے لیے بھاری سکیورٹی لینے کی تجویز دی گئی، کنکشن کے ڈیمانڈ نوٹس سے قبل صارفین سے سٹامپ پیپر لینے کی تجویز دی گئی۔
ذرائع کے مطابق سٹامپ پیپر پر صارفین ایل این جی کے ٹیرف پر کنکشن لینے کا حلف دیں گے، ایل این جی ٹیرف کو کسی بھی پلیٹ فارم پر چیلنج نہ کرنے حلف لیا جائے گا۔
ذرائع نے مزید بتایا کہ وفاق کی شرائط مکمل کرنے والے صارفین کو کنکشن دیا جا سکے گا، سوئی ناردرن گیس کمپنی کے نیٹ ورک پر بھی کنکشن دیا جا سکے گا۔
واضح رہے کہ اس وقت صرف ایل این جی نیٹ ورک والی سکیموں میں کنکشن دیے جا رہے ہیں۔
