لاہور: (دنیا نیوز) آڈٹ رپورٹ 25-2024 نے شوگر مافیا کے کارناموں کا خلاصہ کر دیا، مالی سال 24-2023 میں مل مالکان نے گنے کے کسانوں کی 3 ارب 4 کروڑ 69 لاکھ سے زائد رقم ادا نہ کی۔
آڈٹ رپورٹ میں بتایا گیا کہ قانون کے مطابق گنا خریدنے پر 15 دن کے اندر ادائیگی لازم ہے، مل مالکان نے حکومت کے مختص کردہ ریٹ سے بھی کم قیمت پر گنا خریدا، کل ملا کر مل مالکان نے 3 ارب 5 کروڑ سے زائد رقم کسانوں کو ادا کرنی ہے۔
رپورٹ کے مطابق یہ انکشافات کین کمشنر پنجاب کے آڈٹ کے دوران ہوئے، متعلقہ محکمہ کو اکتوبر 2024 میں آگاہ کیا گیا، محکمے نے کوئی جواب نہ دیا، محکمے نے دسمبر 2024 تک آڈٹ رپورٹ فائنل ہونے تک کوئی جواب نہ دیا۔
