لاہور: (دنیا نیوز) حکومت کی جانب سے پٹرولیم مصنوعات کی قیمتوں میں اضافے کے بعد گڈز ٹرانسپورٹرز نے بھی کرایوں میں اضافہ کرنے کا اعلان کردیا۔
حکومت نے پٹرول کی قیمت میں 4 روپے 7 پیسے فی لٹر جبکہ ڈیزل کی قیمت میں 4 روپے 4 پیسے فی لٹر کا اضافہ کیا ہے، اس سلسلے میں پاکستان گڈز ٹرانسپورٹ الائنس نے پٹرولیم مصنوعات قیمتوں میں حالیہ اضافہ یکسر مسترد کر دیا۔
صدر گڈز ٹرانسپورٹ الائنس ملک شہزاد اعوان نے کہا ہے کہ پٹرول اور ڈیزل کی قیمتوں میں اضافہ ناقابلِ قبول ہے ہم اسے یکسر مسترد کرتے ہیں۔
انہوں نے کہا ہے کہ گڈز ٹرانسپورٹ کا 3 فیصد کرایہ بڑھانے کا اعلان کرتے ہیں، آئے دن پٹرولیم مصنوعات کی قیمتوں میں اضافہ ٹرانسپورٹرز میں عدم استحکام پیدا کر رہا ہے۔
ملک شہزاد اعوان کا کہنا تھا کہ ٹرانسپورٹرز مزید نقصانات کے متحمل نہیں ہو سکتے، اس کے علاوہ ٹرانسپورٹر یونینز جلد اہم اور بڑا فیصلہ کرنے جارہی ہیں۔
انہوں نے مزید کہا ہے کہ حکومت ہمیں احتجاج کرنے پر مجبور کررہی ہے، دیگر ٹیکسز میں بھی مسلسل اضافہ ہورہا ہے، مشاورت جاری ہے جلد لائحہ عمل کا اعلان کریں گے۔
