لاہور: (ویب ڈیسک) پاکستان ویمن کرکٹ ٹیم کی جارح مزاج بلے باز عائشہ نسیم نے کرکٹ سے علیحدگی کا فیصلہ کر لیا۔
18 سالہ عائشہ نے کچھ عرصہ قبل پی سی بی کو فیصلے سے آگاہ کیا تھا تاہم پی سی بی کی کوشش تھی کہ جارح مزاج کرکٹر فیصلہ واپس لے لیں تاہم کرکٹ بورڈ کی کوششیں کامیاب نہ ہو سکیں۔
ذرائع کے مطابق عائشہ نسیم نے کچھ عرصہ قبل پاکستان کرکٹ بورڈ کو آگاہ کیا تھا کہ وہ مزید نہیں کھیلنا چاہتیں، یہ ان دنوں کی بات ہے جب وہ انجری کا شکار تھیں تاہم پاکستان کرکٹ بورد نے اس موقع پر فیصلے کو جذباتی جان کر انہیں سمجھانے کی کوشش کی۔
ذرائع کا کہنا ہے کہ پاکستان ویمن ٹیم کی ایک سینئر کھلاڑی کو بھی عائشہ سے بات کرنے کو کہا گیا تھا، پی سی بی سینٹرل کنٹریکٹ پر فیصلے تک عائشہ کے جواب کا انتظار کرنا چاہتا ہے تاہم عائشہ نسیم اب تک اپنے فیصلے پر قائم ہیں۔
ذرائع کا بتانا ہے کہ عائشہ نسیم نے کسی موقع پر پاکستان کرکٹ بورڈ کو اتنی جلد ریٹائرمنٹ کے فیصلے کی وجوہات سے آگاہ نہیں کیا، 2020 میں پاکستان کی جانب سے ڈیبیو کرنے والی عائشہ نے اب تک چار ون ڈے اور 30 ٹی ٹوئنٹی میچز میں پاکستان کی نمائندگی کی ہے۔
