لاہور: (ویب ڈیسک) آئی سی سی مینز ورلڈکپ 2023 کے فائنل میں آسٹریلیا کے ہاتھوں شکست کے بعد بھارت دنیائے کرکٹ کا نیا 'چوکر' بن گیا۔
اتوار کو کھیلے گئے ورلڈکپ کے فائنل میں آسٹریلیا نے بھارت کو ہوم گراؤنڈ پر شکست دے کر دنیائے کرکٹ پر چھٹی بار حکمرانی قائم کی۔
بھارتی شہر احمد آباد کے نریندرا مودی کرکٹ سٹیڈیم میں کھیلے گئے میچ میں بھارت کی جانب سے جیت کیلئے دیا گیا 241 رنز کا ہدف آسٹریلیا نے 4 وکٹوں کے نقصان پر میچ کے 43 ویں اوور میں پورا کیا، بھارتی ٹیم ایک بار پھر آئی سی سی ایونٹ جیتنے میں ناکام رہی۔
گروپ سٹیج کے 9 میچز اور پھر سیمی فائنل میں بھارت نے نیوزی لینڈ کے خلاف کامیابی حاصل کی تھی لیکن فائنل میں بھارت کو ایک بار پھر شکست کا مزہ چکھنا پڑا۔
بھارتی ٹیم نے 2013 کی چیمپئن ٹرافی جیتنے کے بعد سے 10 آئی سی سی ایونٹس کھیلے اور ہر بار فیورٹ ہونے کے باوجود وہ ٹورنامنٹ جیتنے میں ناکام رہی۔
بھارتی کرکٹ ٹیم کی گزشتہ 10 سالوں میں آئی سی سی ایونٹس میں کارکردگی دیکھ کر اب یہ کہنا غلط نہ ہو گا کہ جنوبی افریقا پرانا ہو گیا اور بھارت دنیائے کرکٹ کا نیا چوکر بن گیا ۔
گزشتہ 10 آئی سی سی ایونٹس میں بھارت کی کارکردگی
2014 کے ٹی ٹوئنٹی ورلڈکپ کے فائنل میں شکست
2015 کے ورلڈکپ کے سیمی فائنل میں شکست
2016 کے ٹی ٹوئنٹی ورلڈکپ کے سیمی فائنل میں شکست
2017 کی چیمپئن ٹرافی کے فائنل میں شکست
2019 کے ورلڈکپ کے سیمی فائنل میں شکست
2021 کی ورلڈ ٹیسٹ چیمپئن شپ کے فائنل میں شکست
2021 کے ٹی ٹوئنٹی ورلڈکپ کے سپر 12 مرحلے میں ہی باہر
2022 کے ٹی ٹوئنٹی ورلڈکپ کے سیمی فائنل میں شکست
2023 میں آئی سی سی ورلڈ چیمپئن شپ میں شکست
2023 میں آئی سی سی ون ڈے ورلڈکپ میں شکست
