بنگلورو: (ویب ڈیسک) بھارت کے اسٹار بیٹر ویرات کوہلی نے ایک اور شاندار سنگِ میل عبور کرتے ہوئے سابق لیجنڈ سچن ٹنڈولکر کا ورلڈ ریکارڈ توڑ دیا۔
ون ڈے کرکٹ میں سب سے زیادہ سنچریاں اسکور کرنے والے ویرات کوہلی لسٹ اے کرکٹ( ڈومیسٹک اور انٹرنیشنل ون ڈے) میں تیز ترین 16 ہزار رنز بنانے والے کھلاڑی بن گئے۔
ویرات کوہلی نے یہ اعزاز بدھ کو وجے ہزارے ٹرافی میں دہلی کی نمائندگی کرتے ہوئے آندھرا پردیش کے خلاف میچ کے دوران حاصل کیا، جہاں انہوں نے شاندار سنچری اسکور کی۔
کوہلی نے آندھرا پردیش کے خلاف 131 رنز کی اننگز کھیلی اس دوران انہوں نے لسٹ اے کرکٹ میں تیز ترین 16 ہزار رنز مکمل کیے، انہوں نے یہ کارنامہ اپنی 330ویں لسٹ اے اننگز میں سرانجام دیا۔
اس سے قبل یہ ریکارڈ سابق بھارتی کرکٹر سچن ٹنڈولکر کے پاس تھا جنہوں نے 391 اننگز میں 16 ہزار رنز مکمل کیے تھے۔
واضح رہے بدھ کو کوہلی کی شاندار سنچری کی بدولت دہلی نے آندھرا پردیش کا 299 رنز کا ہدف با آسانی 6 وکٹوں کے نقصان پر حاصل کرلیا۔
