راولپنڈی: (دنیا نیوز) سوشل میڈیا کے ذریعے بین الاقوامی ایکٹو سمز کی فروخت میں ملوث گینگ کے 5 ملزمان قانون کے شکنجے میں آگئے۔
وفاقی تحقیقاتی ایجنسی (ایف آئی اے) کے مطابق سوشل میڈیا کے ذریعے بین الاقوامی ایکٹو سمز کی فروخت میں ملوث منظم گینگ کے خلاف راولپنڈی میں چھاپہ مار کارروائی کی گئی ، کارروائی کے دوران غیر قانونی بین الاقوامی سمز کی فروخت میں ملوث 5 ملزمان کو گرفتار کیا گیا۔
حکام نے بتایا کہ گرفتار ملزمان میں محمد عامر، محمد مدثر، محمد ذکریا، سید نور اور وجیہہ محمود شامل ہیں، ملزمان سوشل میڈیا کے ذریعے بین الاقوامی سمز کی خریدوفروخت کرتے تھے ، سمز بلیک میلنگ، بھتہ خوری، فراڈ، جعلی سکیموں اور آن لائن مالیاتی فراڈ میں استعمال ہوتی تھیں۔
ایف آئی اے کی جانب سے مزید بتایا گیا ہے کہ گرفتار ملزمان کے قبضہ سے 335 غیر قانونی سمز اور 5 عدد موبائل فون برآمد کر لئے گئے، گرفتار ملزمان کیخلاف مقدمہ درج کرلیا گیا جبکہ مزید تحقیقات جاری ہیں۔
