کراچی: (ویب ڈیسک) عدالت نے لیاری گینگ وار کے سرغنہ عذیر بلوچ و دیگر کیخلاف ارشد پپو قتل کیس میں آئندہ سماعت پر گواہوں کو طلب کرلیا۔
سینٹرل جیل انسداد دہشتگردی کمپلیکس میں خصوصی عدالت کے روبرو ارشد پپو قتل کیس کی سماعت ہوئی، تفتیشی افسر یامین گجر عدالت سے غیر حاضر رہا، تفتیشی افسر کی جانب سے گواہوں کو بھی پیش نہیں کیا جاسکا، عدالت نے آئندہ سماعت پر گواہوں کو طلب کرلیا۔
عدالت نے عذیر بلوچ، زبیر بلوچ، اکرم بلوچ اور ذاکر بلوچ کی بریت کی درخواستوں پر دلائل طلب کئے اور 22 مئی تک سماعت ملتوی کردی، پولیس کے مطابق ارشد پپو سمیت 3 افراد کو گینگ وار کے ملزمان نے بے رحمی سے قتل کیا تھا، مقدمے میں گینگ وار کے سرغنہ عذیر بلوچ اور اس کے بھائی زبیر بلوچ گرفتار ہیں۔
مقدمے میں شاہ جہان بلوچ ، ذاکر بلوچ، اکرم بلوچ اور یوسف بلوچ ضمانت پر رہا ہیں، گینگ وار کے کارندوں کیخلاف تھانہ کلاکوٹ میں مقدمہ درج ہے۔
