لاہور: (دنیا نیوز) لاہور کے علاقے اقبال ٹاؤن میں سی سی ڈی (کرائم کنٹرول ڈیپارٹمنٹ) اور ملزمان کے درمیان رات گئے مبینہ مقابلہ پیش آیا جس کے نتیجے میں زیرِ حراست ملزم لطیف مسیح ہلاک ہوگیا جبکہ اس کے ساتھی اندھیرے کا فائدہ اٹھاتے ہوئے فرار ہونے میں کامیاب ہوگئے۔
پولیس کے مطابق سی سی ڈی کی ٹیم ملزم لطیف مسیح کو ریکوری کے لیے موقع پر لے کر گئی تھی کہ اس دوران پہلے سے گھات لگائے ملزم کے ساتھیوں نے اسے چھڑوانے کے لیے فائرنگ کر دی، ساتھیوں کی فائرنگ سے زیرِ حراست ملزم لطیف مسیح موقع پر ہی مارا گیا۔
پولیس کے مطابق ملزم کے ساتھی فرار ہونے میں کامیاب ہوگئے جن کی گرفتاری کے لیے خصوصی ٹیمیں تشکیل دے دی گئی ہیں، ہلاک ملزم کی لاش پوسٹ مارٹم کے لیے مردہ خانے منتقل کر دی گئی ہے۔
پولیس کا مزید کہنا ہے کہ ہلاک ملزم لطیف مسیح منشیات فروشی، قتل، ڈکیتی اور دیگر سنگین جرائم میں ملوث تھا جبکہ واقعے کی مزید تحقیقات جاری ہیں۔
