گندھارا سینٹر آف آرٹس اینڈ کلچر نوجوان فنکاروں، موسیقاروں، اداکاروں، خواتین اور ڈیجیٹل کانٹینٹ کریٹرز کے لیے ایک ہی چھت تلے وہ سہولیات فراہم کر رہا ہے جو اس سے قبل اس علاقے میں دستیاب نہیں تھیں۔

یہ مرکز مصوری، موسیقی، تھیٹر، فلم سکریننگ، ثقافتی مکالمے اور روایتی سرگرمیوں کے ذریعے سوات کے ثقافتی ورثے کو دوبارہ زندہ کرنے کا ایک منفرد پلیٹ فارم بن کر سامنے آیا ہے۔

سینٹر میں قائم گندھارا گیلری میں مصوری اور گندھارا آرٹ کی نمائشوں کا اہتمام کیا جاتا ہے، جہاں مقامی فنکاروں کے تخلیقی کام کو عوام کے سامنے پیش کیا جا رہا ہے۔

گندھارا سینٹر کے بانی حسنین جمال نے کہا کہ اس سینٹر کے قیام کا بنیادی مقصد یہاں کے آرٹس اور کلچر کو فروغ دینا ہے، ہم نے گندھارا کا نام اس لیے منتخب کیا کیونکہ گندھارا تہذیب اپنی فنون لطیفہ، ثقافت اور آرٹ کی وجہ سے دنیا بھر میں مشہور رہی ہے، اسی مضبوط تاریخی پس منظر کو سامنے رکھتے ہوئے ہم نے اس علاقے میں یہ سینٹر قائم کیا۔

ان کا کہنا تھا کہ گندھارا سینٹر میں موسیقی، تھیٹر اور فلم کے علاوہ مختلف ثقافتی سرگرمیوں کا انعقاد کیا جا رہا ہے تاکہ نوجوانوں کو مثبت اور تخلیقی مواقع فراہم کیے جا سکیں، سوات حجرہ کے نام سے ہفتہ وار سرگرمی بھی شروع کی گئی ہے ، جس کے ذریعے سوات کی روایتی حجرہ ثقافت کو دوبارہ زندہ کرنے کی کوشش کی جا رہی ہے، اس میں سوات کے بزرگ آ کر علاقے کی ثقافت، روایات اور تاریخ پر گفتگو کرتے ہیں، جبکہ لوکل موسیقی، شاعری اور اتن جیسی سرگرمیاں بھی منعقد کی جاتی ہیں۔

گندھارا سینٹر کی خاتون کوآرڈینیٹر انیلا خان سعید نے بتایا کہ مرکز میں خواتین کے لیے خصوصی مواقع پیدا کیے گئے ہیں، سوات اپنی ثقافت، روایات، آرٹس، کرافٹس اور روایتی کشیدہ کاری کی وجہ سے ایک منفرد شناخت رکھتا ہے، اسی بنیاد پر یہ سینٹر قائم کیا گیا ہے تاکہ خواتین کے ثقافتی اور تخلیقی کام کو فروغ دیا جا سکے۔

گندھارا سینٹر آف آرٹس اینڈ کلچر نہ صرف سوات میں تخلیقی صنعتوں کے فروغ میں کردار ادا کرے گا بلکہ نوجوانوں اور خواتین کو روزگار، اظہار اور شناخت کے نئے مواقع بھی فراہم کرے گا، مقامی سطح پر اس اقدام کو آرٹ، موسیقی اور ثقافت کی بحالی کی جانب ایک اہم پیش رفت اور سنگِ میل قرار دیا جا رہا ہے۔