نئی دہلی: (ویب ڈیسک) بھارت میں اپنے بیانات سے مشکلات کا شکار ہونے والی اداکارہ کنگنا رناوت نے متازعہ بیان دیتے ہوئے کہا ہے کہ انگریزوں کا دیا ہوا ملک کا نام انڈیا سے تبدیل کیا جائے۔
بھارتی میڈیا رپورٹس کے مطابق سوشل میڈیا پر اداکارہ نے پوسٹ میں لکھا ہے کہ انگریزوں نے ہمارے ملک کو انڈیا کا نام دیا تھا اور کہا تھا کہ یہ غلام ملک ہے۔
انہوں نے مطالبہ کیا کہ انگریزوں کا دیا گیا نام تبدیل کر کے اسے بھارت پکارا اور لکھا جائے۔ بھارت کا مطلب لکھتے ہوئے انہوں نے بتایا کہ یہ سنسکرت کے تین لفظوں سے مل کر بنا ہے۔
ان کا کہنا ہے کہ ہندوستان تب ہی ترقی کرسکتا ہے جب وہ اپنی قدیم روحانیت اور حکمت سے جڑا رہے۔
خیال رہے کہ کنگنا رناوت نے اداکاری کے بعد پروڈکشن کے میدان میں بھی قدم رکھ لیا ہے۔ ان کے پروڈکشن ہاؤس کے بینر تلے بننے والی نئی فلم ٹیکو ویڈز شیرو کو اسٹریمنگ ویب ایپ پر جاری کیا جائے گا۔
