کراچی: (دنیا نیوز) اردو تہذیب و روایت کی روشن مثال ہر دلعزیز فاطمہ ثریا بجیا کو دنیا سے رخصت ہوئے 9 برس گزر گئے۔
ناول نگار فاطمہ ثریا بجیا یکم ستمبر 1930ء کو بھارتی شہر حیدرآباد دکن میں پیدا ہوئیں، وہ معروف مصنف انور مقصود کی بڑی بہن تھیں۔
معروف ادیبہ فاطمہ ثریا بجیا نے پاکستان ٹیلی وژن، ریڈیو اور سٹیج کیلئے بے شمار ڈرامے لکھے، ان کے معروف ڈراموں میں’عروسہ، شمع، انا اور افشاں سمیت دیگر شامل ہیں۔
ڈرامہ نگار فاطمہ ثریا بجیا کی ادبی خدمات کے اعتراف میں انہیں تمغہ برائے حسن کارکردگی اور ہلال امتیاز سے نوازاگیا، بجیا نے بین الاقوامی اعزازات بھی حاصل کئے جن میں جاپان کا اعلیٰ ترین شہری اعزاز بھی شامل ہے۔
سادگی، خلوص، وضع داری کا پیکر فاطمہ ثریا بجیا 10 فروری 2016ء کو طویل علالت کے بعد انتقال کر گئی تھیں، لیکن اپنی روشن تحریروں کے باعث آج بھی لوگوں کے دلوں میں زندہ ہیں۔
