سیؤل: (ویب ڈیسک) جنوبی کوریا کے مشہور اداکار گونگ یو کو ہراسانی کے جھوٹے الزامات پر مبنی مقدمے میں بری کردیا گیا۔
عدالت نے 40 سالہ خاتون کو ہراسانی کے جھوٹے الزامات پر 6 ماہ قید کی سزا سنائی ہے، خاتون کو جھوٹی معلومات پھیلانے اور انفارمیشن نیٹ ورک پروٹیکشن ایکٹ کی خلاف ورزی کا قصوروار ٹھہرایا گیا ہے۔
سوشل میڈیا پر جنوری 2020 سے مارچ 2021 کے دوران خاتون نے 235 مرتبہ جھوٹے الزامات اور توہین آمیز تبصرے پوسٹ کیے جن میں خاتون نے دعویٰ کیا تھا کہ 46 سالہ اداکار نے انہیں ہراساں اور دھمکایا۔
تحقیقات کے بعد ثابت ہوا کہ گونگ یو کا خاتون سے کوئی ذاتی تعلق نہیں تھا، تمام الزامات بے بنیاد اور جھوٹے قرار پائے جس پر عدالت نے گونگ یو کو بری کر دیا اور خاتون کو سزا سنا دی۔
واضح رہے کہ جنوبی کوریا کے معروف اداکار گونگ یو نے نیٹ فلکس کی مقبول ترین سیریز سکوئڈ گیم میں کام کیا ہے۔
